۸صبح، پکتیکا: د پکتيکا سیمهییزې سرچينې وايي، ناڅرګندو وسلهوالو په دغه ولایت کې د یوې کورنۍ پر غړو ډزې کړي چې په ترڅ کې یې دوه ماشومان وژل شوي دي.
سرچینو دوشنبه د لړم پر ۲۸مه ۸صبح ورځپاڼې ته ویلي چې دا کسان تېره ورځ د پکتیکا د برمل ولسوالۍ په «رخه» سیمه کې وژل شوي دي.
د سرچينې د معلوماتو پر بنسټ، د دې ډزرو په ترڅ کې یو کس ټپي شوی او د دې کورنۍ څلور غړي له دې بریده روغ وتلي دي.
د دغه برید انګیزه لا نه ده روښانه.
سرچينې زیاتوي چې له دې بريد وروسته ناڅرګند وسلهوال له سيمې تښتېدلي دي.
په پکتیکا کې طالبانو تر اوسه په دې هکله څه نه دي ویلي.
د يادونې ده چې دوه ورځې مخکې ناڅرګندو وسلهوالو په تخار ولايت کې يو ځوان ډاکټر په ډزو وژلی و.
