د کندز ولايت زدهکوونکي: د ښوونکو او درسي موادو له کمښت سره مخ يؤ
۸صبح
۸صبح، کابل: د کندز ولايت د ښوونځيو يو شمېر زدهکوونکي د ښوونکو، مېزونو، څوکيو او درسي کتابونو د کمښت په اړه نيوکې کوي. هغوی وايي په ستونزمنو شرايطو کې د ګرمو خېمو لاندې زدهکړې کوي چې دغه وضعيت دوی اندېښمن کړي دي.
دغه زدهکوونکي د کندز پوهنې رياست څخه غواړي چې د دوی ستونزې حل کړي.
په ورته وخت کې د کندز د پوهنې رئيس نجيب الرحمن ثاقب د ښوونکو، تجهيزاتو او درسي وسايلو د کمښت ستونزه مني او وايي چې د حل په موخه يې هڅې دوام لري.
د کندز د پوهنې رئيس وايي، د ۵۲۳ ښوونځيو له ډلې ۱۸۰ ښوونځي ودانۍ نلري چې له همدې امله لږ تر لږه ۱۰۰ زدهکوونکي د خېمو لاندې په زدهکړو بوخت دي.
د کندز د پوهنې رئيس په وينا، د کندز د ښوونځيو لپاره د کتابونو د کمښت موضوع يې د پوهنې وزارت سره شريکه کړې ده چې د ۳۰ ميليونه نويو کتابونو په چاپ سره به دغه ستونزه حل شي.
اوسمهال د کندز ولايت مرکز او ولسواليو کې څه باندې ۳۵۰ زره زدهکوونکي ښوونځيو ته ځي چې له دې ډلې څخه ۳۹ سلنه يې نجونې دي.
د کندز د پوهنې رئيس په وينا، په کندز کې د ۵۲۳ ښوونځيو له ډلې ۶۰ سلنه يې د طالبانو تر ولکې لاندې سيمو کې دي چې د هغوی تر حاکميت لاندې سيمو کې هم د نجونو او هلکانو ښوونځي فعال دي او زده کوونکي پر زدهکړو بوخت دي.
