د لغمان ولایت د الینګار ولسوال، امنیه قوماندان، ملي اردو د کنډک درستیزوال او د ملي امنیت د امریت مرستیال په دې تور نیول شوي، چې ولسوالۍ يې په لوی لاس طالبانو ته پريښې.
د لغمان والي عبدالولي واحدزي د نظامي شورا په ناسته کې د یادو مسؤلینو د نیولو امر کړی دی. نوموړي ویلي چې دوی له دښمن سره سودا کړې او باید سخته سزا وګوري.
عبدالولي واحدزي وويل: «د الینګار ولسوال، سرپرست امنیه قومندان، د ملي اردو د کنډک درستیزوال او د ملي امنیت د امریت مرستیال د لغمان له رهبرۍ د روانې اونۍ د دوشنبې په ورځ د مرستې غوښتنه کړې وه چې دښمن ولسوالۍ له سخت فشار لاندې راوستې، چې همهاله د لغمان ولایت د نظامي شورا له لوري د ۲۰۱ سېلاب قول اردو په ګډې همکارۍ ورته په وخت هوایي حمایه ورورسېده او د دښمن ګڼ مهم قومندانان ووژل شول.»
والي واحدزی وایي، د یادې ولسوالۍ ملکي او نظامي مسؤلینو مخکې له دې، چې ولایتي رهبري په جریان کې کړي، د چنګاښ په ۱۴مه نېټه له ولسوالۍ وتلي او هلته یې وسایط او نور تجهزیات پریښي دي.
د لغمان والي په مشرۍ د نظامي شورا د پرېکړې له مخې یاد مسوولین، چې په خبره يې په لوی لاس یې له دښمن سره سودا کړې د مکافاتو او مجازاتو د اصل پلي کېدو په خاطر عدلیي او قضایي ارګانونو ته وروپېژندلي دي.
چارواکي وايي، د الینګار ولسوالۍ نیول شوي مسؤلین څلور واړه اوس مهال په ملي امنیت ریاست کې تر جدي پوښتنو او ګروېږنو لاندې دي.
د لغمان ولایتي چارواکي، ولسونو ته ډاډ ورکوي، چې ولسوالۍ طالبانو نیولې نه ده او د ولسوالۍ د مسؤلینو له لورې د معاملې په صورت کې پرېښودل شوې.
والي ویلې، چې ډېر ژر به د ولسوالۍ بېرته نیولو او هلته د ځواکونو ځای پر ځای کولو په موخه لازم اقدامات ترسره شي.
ومو غوښتل د الینګار ولسوال او سرپرست امنیه قومندان سره هم خبرې وکړو او د دې پېښې په اړه د هغوی نظر واخلو، خو بریالي نه شو.
له دې پېښې شاوخوا دوه اونۍ وړاندې د الینګار ولسوال ۸صبح ته ویلي ؤ، چې ولسوالۍ کې پوره امن دی او د هر ډول وضعیت مهار کولو ته چمتووالی شته دی.
د الینګار سرپرست امنیه قوماندان رومل نیازي هم دوه اونۍ وړاندې ۸صبح ته ویلي ؤ، چې طالبان په دې ولسوالۍ جګړه نه شې کولی او نه هم د دوی د اکمالاتو مخه نیولی شي.
قوماندان رومل ویلي ؤ: «طالبان په الینګار جګړه نه شي کولی تر څو چې زه ژوندی یم، زمونږ اکمالات هم نه شي بندولی، ما سره زربتیان نه شته، زما همدا پولیس زربتیان دي.»
د لغمان ولایتي چارواکي لا هم د الینګار ولسوالۍ د سقوط خبر نه تائیدوي، وايي ځایي مسؤلینو د یوې دسیسې له مخې طالبانو ته پريښې ده.
ومو غوښتل د الینګار ولسوالۍ او د ځايي مسؤلینو نیولو په اړه يې د لغمان امنیه قوماندان نظر هم واخلو، هغه ځواب نه وايي.
د لغمان له درې ولسوالیو دولت شاه، عليشنګ او بادپخ وروسته الینګار څلورمه ولسوالۍ شوه، چې دې ولایت کې د طالبانو لاسته ورځي.
د الینګار له تازه جګړو نه ګڼ شمېر خلکو یوازې خپل سرونه او ماشومان ویستلي دي، خپل کورونه يې پرېښي او نورو سیمو ته بې ځایه شوي دي.
په ټولنیزو رسینو کې یوه ویډیو ډېره لاس په لاس کېږي، چې په کې ښکاري یوه زړه ښځه چې دوه نورې ښځې او ماشومان هم ورسره دي، د جګړو له سیمو د وتلو پرمهال بېرته په شاه شاه خپل کلي لور ته ګوري.
دې ویډیو د خلکو احساسات را پارولي او د جګړې د غندنې لیکل يې پرې کړي.
د لغمان یو ځايي اوسېدونکي او خبریال پر خپله فیسبوک پاڼه لیکلي: «مورې وروسته وروسته مه ګوره هېڅ څوک دې د خلاصېدو نشته چې تا له دې عذابه وژغوري. ګرانو خویندو او ګرانو ماشومانو ورځئ، دا خاوره، دا کلي او دا بانډې ستاسو نه دي، دلته یو عذاب راغلی، داسې عذاب چې هېڅ څوک ترې په امن کې نه دي. ګرانو میندو، خویندو او ګلالیو ماشومانو، ورځئ، ستاسو په شان نورې په زرګونه کورنۍ هم په تش ډاک او سپینه دښته کې شپې ورځې سبا کوي تاسو هم ورځئ. ګرانې مورکۍ له قدمونو دې ځار. ګرانې خورکۍ ستاسو ازار دې د وطن دښمنان ووهي. ګلالیو ماشومانو ستاسو هېڅ حق موږ ادا نشو کړای، بښنه وکړئ»
