د لغمان چارواکي: د طالبانو بریدونه په شاه تمبول شوي

۸صبح، لغمان: د لغمان ولایت چارواکي وایي، د طالبانو وروستي بریدونه یې، په شاه تمبولي او درنه مرګ ژوبله یې ورته اړولې ده.
د افغان ځواکونو او طالبانو تر منځ د لغمان مرکز مهترلام ته نږدې جګړې هغه وخت زور وموند چې، د ښار دوه کمربندي پوستې د طالبانو لاسونو ته ورغلې.
عیني شاهدان وايي، چې جګړه د مهترلام محبس تر انګړه رارسېدلې وه، خو د محبس مدیر بیا په یوه ویډیویي پیغام کې وویل، چې د محبس شاوخوا امنیتي ځواکونه ځای پر شوي او وضعیت عادي دی.
د راپورونو له مخې د لغمان والي رحمت الله یارمل او لوی درستیز ستر جنرال محمد یاسین ضیا او د ملي امنیت لومړي مرستیال د مهترلام ښار امنیتي کمربندونو او ګڼو سیمو څخه له نږدې لیدنه کړې او عملاً په مهترلام ښار کې حضور لري.
د لغمان والي وایي، د طالبانو بریدونه یې په شاه کړي او هغوی ته یې درنه مرګ ژوبله اړولې ده، خو د کره ارقامو په اړه یې نور جزيیات شریک نه کړل.
هغه زیاتوي چې د امنیتي ځواکونو عملیات د علینګار او علیشنګ ولسوالیو په لور روان دي او په ښار کې حالت مخ په ښه کېدو دی.
په ورته وخت کې، په ختیځ کې د ۲۰۱ سېلاب قل اردو وایي چې سیمې ته د صفر ۲ قطعې ځانګړي ځواکونه رسیدلي او جګړه له ښاره لرې شوې ده.
وسله والو طالبانو تر دې دمه رسنیو ته د جګړې او اوښتو زیانونو په اړه څه نه دي ویلي.