تېره مياشت د اوسپنې پټلۍ له لارې څه باندې ۱۳ زره توکي بهر ته صادر شوي

د افغانستان د اوسپنۍ پټلۍ اداره وايي چې د تېرې يوې مياشتې په ترڅ کې ۱۳ زره او ۴۹۷ ټنه د هېواد توليدي او کرنيز توکي د حيرتان – مزارشريف او خواف – هرات او تورغندۍ له لارې له هېواد څخه بهر ته استول شوي دي.
د اوسپنې پټلۍ ادارې لخوا په خپرې شوې اعلاميې کې راغلي دي چې دغه توکي د روزنګ، مزارشريف، حيرتان او تورغندۍ په تمځايونو کې بار شوي او ترکمنستان، ازبکستان او روسيې هېوادونو ته استول شوي دي.
د دغې ادارې د معلوماتو له مخې هره ورځ پرته له کوم ځنډه حيرتان، تورغندۍ او اقينې له لارو څخه د توکو لېږدول دوام لري او په تېرې یوې میاشت کې ۵ زره او ۱۶۷ واګونه سوداګريز توکي هېواد ته وارد شوي دي.
د اوسپنې پټلۍ اداره وايي، په دغه وراد شويو واګونونو کې، ٣٨٣ زرو څخه زیات ټڼه سوداګريز توکي ؤ چې عمده برخه يې خوراکي توکي او پاتې برخه يې نفتي، ساختماني او نور د ارټیا وړ توکي جوړوي.