۸صبح، کابل: د روسیې د بهرنیو چارو وزیر سرګي لاوروف وايي، امریکا او متحدین یې هڅه کوي چې د افغانستان د نازک وضعیت په بهیر کې لاسوهنه وکړي.
د روسیې ټاس خبري اژانس د راپور پر بنسټ، لاوروف دا څرګندونې پنجشنبه د لړم پر ۱۰مه، د اوراسیا امنیت په تړاو د «مینسک» په دویمه نړیواله غونډه کې مطرح کړې دي.
هغه زیاته کړې چې د امریکا او د هغې متحدینو یرغلیز فعالیتونه د ټولې اسیا امنیت له ګواښ سره مخامخ کوي.
د روسیې د بهرنیو چارو وزیر په دې غونډه کې ویلي چې واشنګټن په سیمه کې د نفاق او ناورین رامنځته کولو په لټه دی.
د لاوروف په وینا، لوېدیځ هېڅکله نه غواړي چې د اوراسیا سیمه باثباته پاتې شي.
نوموړي روسي ډيپلوماټ له اسيايي هېوادونو غوښتي چې اتحاد او پيوستون ولري.
هغه څرګنده کړې چې امریکا په سوېلي قفقاز کې د لاسوهنې هڅه کوي او په وینا یې، غواړي چې د ارمنستان او اذربایجان د سولې بهیر تر اغېز لاندې راولي.
لاوروف همداراز ویلي چې امریکا غواړي د افغانستان په چارو کې د بېلابېلو پلمو له لارې لاسوهنه وکړي.
د روسیې د بهرنیو چارو وزیر ټینګار کړی چې دوی په هېڅ ډول نه غواړي څو امریکا په سیمه کې پوځي حضور ولري.
لاوروف وړاندې وايي چې هېوادونه دې په نړيوال نظام کې د خپلو ګټو د خونديتوب لپاره له زوره کار نه اخلي.
