۸صبح، کابل: د امریکا لارنس تخنیکي پوهنتون په یوې نظرپوښتنه کې موندلې چې پر افغانستان د طالبانو له واکمنېدو وروسته، شاوخوا ۹۰ سلنه افغانان له لوږې سره مخ شوي دي.
د افغانستان په تړاو د دې نظرپوښتنې موندنې جمعه د مرغومې پر ۲۸مه خپرې شوې دي.
د دې نظرپوښتنې پر بنسټ، ۸۴ سلنه افغانان روغتیايي خدمتونو ته لاسرسی نه لري.
د لارنس تخنیکي پوهنتون څېړونکو ویلي چې ۸۵ سلنه افغانان د تاوتریخوالي له ګواښ سره مخ دي.
د دغه پوهنتون په وینا، په نظرپوښتنه کې ۸۰۰ افغانانو چې ۹۴ سلنه یې نارینه وو، برخه اخیستې وه.
ګډونوالو د بشري مرستو، د بیان ازادۍ محدودیتونو، د ښځو حقونو، خوارځواکۍ او بېکارۍ په تړاو نظرونه وړاندې کړي دي.
د نظرپوښتنې له مخې، ګډونوال د ۱۸ او ۲۹ کلونو ترمنځ وو.
د نظرپوښتنې د موندنې له مخې، د افغانستان وضعیت پر ټولو خلکو منفي اغېزه کړې ده.
شاوخوا ۷۲ سلنه ګډونوالو ویلي چې پر افغانستان د طالبانو له واکمنېدو وروسته د دوی د کورنۍ یو یا څو غړي وژل شوي یا له هېواده بېځایه شوي دي.
د نظرپوښتنې موندنې ښيي چې د ټولنیزو او رواني فشارونو له امله د ۹۰ سلنه افغانانو د ژوند کیفیت ټیټ شوی دی.
د دغه پوهنتون په خبره، نظرپوښتنه د افغانانو په منځ کې د رواني فشار لوړه کچه ښیي.
د یادونې ده چې پر هېواد د طالبانو له واکمنېدو وروسته، د دې ډلې تر کنټرول لاندې ډیری افغانان په بشري مرستو پورې تړل شوي دي.
همداراز په ملیونونو خلک د امنیتي ګواښونو او پراخې بېوزلۍ له امله کډوالۍ ته اړ شوي دي.
