په ننګرهار کې مېرمنو ته د پورونو ورکړه

په ننګرهار ولایت کې، ۸۰۰ مېرمنو ته، د کوچنیو سوداګریزو کارونو لپاره، لنډ مهاله پورونه ورکول کیږي.
دغه پورونه د کليو پراختيا وزارت له خوا ورکول کیږي چې موخه یې د ښځو اقتصادي پیاوړتیا ده.
مسوولين وايي چې د ننګرهار په شپږو ولسواليو کې، مېرمنې د ځانګړو ټولنو په جوړولو پور ترلاسه کوي او بيا د خپلې خوښې کار پیلوي، چې ډیری یې د لاسي صنایعو په برخه کې پر کارونو بوختې دي.
د لاسي صنایعو په چاره بوختې مېرمنې وايي چې په دې پروګرام سره يې، د کورنۍ په اقتصاد کې د پام وړ ښه والی راغلی دی.
د ننګرهار د بهسودو ولسوالۍ اوسېدونکې سمینه چې د یوې ټولنې مشري کوي، وايي چې په لسو ګروپونو کې کابو۱۰۰ تنه کار کوي، چې ۸۰ سلنه يې مېرمنې دي.
نوموړې د کليو پراختيا وزارت پور ترلاسه کړی او اوس يې په کور کې د لاسي صنعت کوچنی کاروبار پیل کړی دی.
چارواکي وايي چې د کليوالي سیمو د مېرمنو د اقتصاد د پياوړتيا پروګرام له لارې په ننګرهار کې ۸۰۰ داسې مېرمنې شته چې د کوچنيو پورونو په ترلاسه کولو د لاسي صنایعو په برخه کې د کار زمینه برابره وبرابره شوې ده.
ددغه پروګرام چارواکي وايي، غواړي چې دا پروګرام د ننګرهار نورو ولسواليو ته هم وغځوي چې سلګونه نورو مېرمنو ته هم د کار او اقتصادي فعالیت زمینه برابره شي.
دوی وايي چې د مېرمنو د اقتصادي پیاوړتیا سره به نه یوازې د خپلو کورنیو په اقتصادي پياوړتیا کې ونډه اخلي؛ بلکې د کورنیو تولیداتو کچه هم ورسره لوړېږي چې دا کار د بهرنیو توکو په مخنیوي کې هم رول لوبولی شي.