۸صبح، ننګرهار: په ننګرهار کې ځايي سرچینې وايي چې پر یو کور د تندر لوېدو په پېښه کې دوه کسان ټپيان شوي دي.
سرچینو سهشنبه د تلې پر ۲۱مه ۸صبح ورځپاڼې ته وویل چې تېره شپه د ننګرهار په څو ولسوالیو کې ورښتونو او ږلۍ زیانونه اړولي دي.
د سرچینو په خبره، په سپین غر، کوټ، حصارک او ځينو نورو ولسوالیو کې کرنیزو ځمکو، استنادي دیوالونو، کورونو، سړکونو او پلونو ته زیان اوښتی دی.
دا په داسې حال کې ده چې د سرچینو په خبره د کونړ په چپې درې ولسوالۍ کې هم بارانونو او سېلابونو درې کسان ټپيان کړي او مالي زیانونه یې اړولي دي.
پېښو ته د چمتوالې ادارې هم خبر ورکړی چې تېر کال د افغانستان په بېلابېلو سیمو کې د طبیعي پېښو په پایله کې ۶۷۹ کسان مړه شوي دي.
