دا چې په دې وروستيو کې د رسنيو او خبريالانو پروړاندي امنيتي ګواښونه زيات شوي، خبريالان يې لامل معلوماتو ته نه لاس رسى بولي .
د کندهار يو شمېر خبريالانو د کندهار له نوي ټاکل شوي والي، روح الله خان زاده سره د خبريالانو پروړاندې د ګواښونو او معلوماتو ته د نه لاس رسي په برخه کې خپلې ستونزې شرکي کړې او ويې ويل، خبريالانو ته د حکومت لخوا پر وخت د نه معلوماتو د رسېدو له امله يې ژوند له ګواښ سره مخ دى او هره ورځ يې له همدې امله کارونه نيمګړي پاتې کېږي .
د کندهار سيمه ييز خبريالان وايي حکومتي ادارې خبريالانو ته پر وخت معلومات نه ورکوي چې، له همدې امله د ځينو پېښو او راپورونو پر سر د خبريالانو ژوند ګواښل کېږي .
د کندهار والي، روح الله خان زاده ژمنه وکړه چې له دې وروسته به ټول هغه معلومات د رسنيو سره شريکوي چي خلک او خبريالان ورته اړتيا لري .
ښاغلي خان زاده د بيان ازادي د دولت يوه لويه لاسته راوړنه وګڼله او ويې ويل، له دې وروسته به د خبريالانو سره ټول اړوند معلومات د دولتي ادارو له لوري شريکوي څو د فساد پر ضد په مبارزه او ټولنيز عدالت کې ورسره مرسته وشي .
نوموړي وويل، د معلوماتو په شريکولو سره به له يوې خوا د خلکو باور پر حکومت زيات شي او له بلې خوا به د خبريالانو پروړاندې امنيتي ستونزي حل شي .
دا په داسي حال کې ده چي په دې وروستيو کي د ولايتونو له وياندويانو څخه د معلوماتو د شريکولو صلاحيت اخيستل شوى دى چې دې کار د رسنيو کارونه سخت ستونزمن کړي او د خبريالانو پروړاندې يې امنيتي ستونزې زياتې کړي دي .
