۸صبح، کابل: د ملي جنبش مشر مارشال عبدالرشید دوستم، د زمري پر شپاړسمه له ولسمشر محمداشرف غني سره لیدلي دي.
د جنبش ګوند ویاند احسان نیرو، ۸صبح ورځپاڼې ته ویلي، مارشال دوستم ولسمشر غني ته وړاندیز کړی، چې دولت دې په هېواد کې نظامي وضعیت اعلان کړي.
د نیرو په خبره، هېواد کې د نظامي وضعیت اعلان د مارشال دوستم د طرحې یوه برخه ده، چې ولسمشر غني نه ده رد کړې.
احسان نیرو ویلي، مارشال دوستم وړاندیز کړی دی، چې د کمانډویانو په قطعاتو کې د سیاسي مشرانو په ګډون یوه لویه غونډه جوړه او هلته دې هېواد کې نظامي وضعیت اعلان شي.
د نوموړي په خبره، تمه ده په راتلونکو دوو ورځو کې په رسمي توګه دغه طرحه عملي شي.
د جنبش ګوند ویاند زیاته کړه، مارشال دوستم له ولسمشر غني سره په هېواد کې د عمومي وضعیت، شمالي او شمال ختیځو ولایتونو وضعیت ته د رسیدګۍ په موخه خبرې کړې دي.
احسان نیرو ویلي، مارشال دوستم د ځانګړې ناستې د غوښتنې وړاندیز کړی دی، چې ولسمشر غني هم منلې ده.
نیرو ویلي، د کابل ښار او د دغه ښار د کمربندونو، د حامد کرزي نړیوال هوایي ډګر، شمال کې د منظمې قوې جوړېدا او د ملي امنیت له لوري د کابل ښار د وضعیت ارزونه د مارشال دوستم د طرحې له محورونو څخه دی.
مارشال دوستم، د شبرغان امنیتي وضعیت ته په کتو د ۵۰۰ ځانګړو ځواکونو د لېږدولو غوښتنه کړی دی، چې د ولسمشر غني له خوا منل شوې ده.
طالبانو د جوزجان د مرکز د نیولو ادعا کړې ده.
د جنبش ګوند ویاند ویلي، چې د مارشال دوستم ټولې طرحې او وړاندیزونه د ولسمشر غني له لوري منل شوې دي.
د جنبش ګوند د ویاند په خبره، مارشال دوستم په پای کې ولسمشر غني ته ویلي، چې پر هغه «باور» وکړي؛ ځکه نوموړی یو وطنپال شخص دی.
جمهوري ریاست تر اوسه په رسمي توګه په دې هکله څه نه دي ویلي.
تېره ورځ په سپېدار ماڼۍ کې سیاسي مشرانو د مارشال دوستم په ګډون ناسته کړې ده. په دې ناسته کې د روان امنیتي وضعیت او د سولې په هکله خبرې شوې دي.