۸صبح، کابل: د طالبانو د ریاستالوزرا سیاسي مرستیال مولوي عبدالکبیر په کابل کې د قطر سفارت له مستشار سره په کتنه کې ویلي چې دوحه د طالبانو په بهرنۍ پالیسۍ کې مهم ځای لري.
د ارګ پر اېکس پاڼه یکشنبه د وږي پر ۴مه لیکل شوي چې مولوي عبدالکبیر په کابل کې د قطر سفارت له مستشار مردف القاشوطي سره کتلي دي.
عبدالکبیر زیاته کړې چې له دوحې سره په اقتصادي، سیاسي، ښوونیزو، صنعت او پانګونې په برخو کې دوه اړخیزو همکاریو ته لېواله دي.
نوموړي زیاته کړې چې له اسلامي نړۍ هیله لري چې په خپلو هېوادونو کې افغان ځوانانو ته د لوړو زدهکړو فرصتونه برابر کړي.
ورته مهال، د ښاغلي القاشوطي له قوله لیکل شوي: «قطر له افغانانو سره خپلو بشري مرستو ته دوام ورکوي او غواړي په بېلابېلو برخو کې له [طالبانو] سره خپله همکاري پراخه کړي.»
څه موده وړاندې د طالبانو د ریاستالوزرا اداري مرستیال عبدالسلام حنفي له قطري پلاوي سره په کتنه کې د سیمې او نړۍ له هېوادونو په ځانګړې توګه له قطر څخه غوښتي و چې افغان ځوانانو ته د ښوونې او روزنې او تحصیلي بورسیو په ځانګړي کولو کې همکاري وکړي.
د یادونې ده چې قطر طالبان په رسمیت نه پېژني؛ خو نږدې اړیکې ورسره پالي.
