د حافظې ارزښت

کېدای شي تاسو په ژوند کې د حافظې په ارزښت پوه شئ خو غواړم په دې اړه تاسو ته لږ توضيحات وړاندې کړم، ځکه چې که تاسو د حافظې د واقعي ارزښت په اړه پوه شئ نو دغه پوهه به له تاسو سره ستاسو په پرمختګ کې ډېره مرسته وکړي.
زموږ ټول ژوند حافظه ده. دا چې څوک يؤ، دا چې څه غواړو او يا په څه پوهېږو ټول زموږ په حافظې کې ثبت دي. که حافظه ونه لرو، پېژندنه نه لرو. داسې ګومان وکړئ چې يو چا خپل نوم هېر کړی او نه پوهېږي چې څوک دی، په دې نه پوهېږي چې څه وکړي. هېڅ خاطره نه لري. هغه نه شي کولای کوم معلومات یې چې لوستي دي، ياد ته راولي. هغه د خپل شاوخوا خلک نه پېژني او په ژوند کې هېڅ ډول موخه نه لري. ډېره دردوونکې ده، زموږ ټول ژوند حافظه ده. هغه کمپيوټر چې هارډډېسک (حافظه) نه لري، هېڅ په درد نه خوري.
د دې لپاره چې په ژوند کې په سمه توګه پرمختګ وکړئ او وځلېږئ، اړتیا ده چې پياوړې حافظه ولرئ او په سمه توګه له خپلې حافظې ګټه واخلئ. ستاسو حافظه ستاسو هغه لویه شتمني ده چې خدای (ج) تاسو ته درکړې ده. له حافظې پرته موږ نه شو کولای چې په خپلو چارو کې ښه وځلېږو ځکه کله چې زموږ هېڅ هم په ياد نه وي موږ بريا نه شو ترلاسه کولای.
ډاکټر ويليم کلم د غوره حافظې د درلودلو لپاره څو ځانګړنې وړاندې کړي چې په لاندې توګه دي:
۱ـ یادول، چې یو ډول ذهني روزنه ده.
۲ـ دې ته پاملرنه چې موږ نه شو کولای هر څه په ګوګل کې پيدا کړو.
۳ـ د اړتیا وړ معلوماتو یادول، موږ ته د فکر کولو زمينه برابروي.
۴ـ د غوره حافظې درلودل له موږ سره مرسته کوي چې يو غوره زدکوونکی واوسو.