۸صبح، کابل: میرر نشریې راپور ورکړی چې د القاعده د پخواني مشر اسامه بن لادن زوی، حمزه بن لادن لا هم ژوندی دی او دا ډله له افغانستانه رهبري کوي.
اېنډيټيوي شنبه د وږي پر ۲۴مه د دغې نشریې په حواله راپور ورکړی چې حمزه له خپل ورور عبدالله بن لادن سره په پټ ډول له افغانستانه القاعده شبکه اداره کوي.
دغې شبکې همداراز د بسیج ملي جبهې د موندنو له مخې ویلي چې د القاعدې یو لوړپوړی غړی د ۴۵۰ نښهوېشتونکو په ملاتړ د افغانستان په شمال کې اوسېږي.
شاوخوا شپږ کاله مخکې امریکايي رسنیو د حمزه بن لادن د وژل کېدو خبر خپور کړی و.
هغه مهال درېیو امریکايي چارواکو د لا ډېرو جزییاتو له ورکړې پرته دا خبر منلی و.
په القاعده کې د حمزه بن لادن زیات نفوذ ته په کتو، امریکا د ۲۰۱۷ په جنورۍ کې هغه د «نړیوال ترهګر» په توګه تحریم کړی و.
د متحده ایالاتو د بهرنیو چارو وزارت په ۲۰۱۹ کال کې د هغه د ځای او پیدا کېدو او پېژندنې په موخه یو میلیون ډالر انعام ټاکلی و.
تر دې مخکې هم د طالبانو تر کنټرول لاندې افغانستان کې د القاعده شبکې د لوړپوړو مشرانو د حضور په تړاو راپورونه ورکړل شوي وو.
څه موده مخکې د روسیې د بهرنیو چارو وزیر سرګي لاوروف ویلي و چې له افغانستانه ګواښونه دوام لري او په وینا یې، د داعش او القاعده په څېر د ترهګرو ډلو مرکزونه اوس هم په دغه هیواد کې دي.
