۸صبح، کابل: طالبانو خبر ورکړی چې پرون له بېلابېلو لارو افغانستان ته ۲۰۷ کورنۍ چې ۹۴۵ کسان کېږي، راستنې شوې دي.
د طالبانو مرستیال ویاند حمدالله فطرت دوشنبه د وږي پر ۳۰مه په خپرې کړې خبرپاڼې کې لیکلی چې یوازې د تورخم له لارې ۶۸ کورنۍ چې ۳۴۷ کسان کېږي، افغانستان ته راغلې دي.
د خبرپاڼې له مخې، ۳۱ کورنۍ د سپین بولدک، ۹۵ کورنۍ د نیمروز او ۱۳ نورې د هرات د اسلامکلا له لارې راستنې شوې دي.
داسې مهال د راستنېدونکو بهیر روان دی چې افغانستان په کور دننه له اقتصادي ننګونو سره مخ دی او مرستندویه بنسټونه د راستنو شویو کورنیو د اړتیاوو د پوره کولو لپاره له ستونزو سره مخ دي.
د راستنېدونکو د شمېر له زیاتېدو سره هممهاله، راستنېدونکو کورنیو ته د سرپناه، خوړو، روغتیايي خدماتو او کاري بوختیاوو اړتیا لا هم مهمې ننګونې بلل کېږي.
