۸صبح، ننګرهار: په ننګرهار کې ځایي سرچینې وايي چې په دغه ولایت کې د هاوان مرمۍ د چاودنې له امله درې ماشومان وژل شوي دي.
په دغه ولایت کې سرچینو د تلې پر ۸مه، ۸صبح ورځپاڼې ته وویل چې دا پېښه تېر ماښام د دغه ولایت د خوږیاڼیو ولسوالۍ په زاوه سیمه کې شوې ده.
د سرچینو په وینا، دا پېښه هغه مهال شوې چې ماشومانو د هاوان مرمۍ له موندلو وروسته پر هغې لوبې کولې.
سرچینې زیاتوي چې د دغو ماشومانو عمرونه له اوو تر ۱۰ کلونو پورې وو.
د یادونې وړ ده چې په هېواد کې له تېرو جګړو پاتې ناچاوده توکي وخت ناوخته له خلکو قرباني اخلي.
