د روسیې د بهرنیو چارو وزارت مرستیال سرګي ریابکوف خبرداری ورکړی چې امریکا باید د روسیې په خاوره کې د خپلو متحدینو له مداخلې لاس واخلي.
ریابکوف دا څرګندونې یکشنبه د سپټمیر پر لومړۍ له ټاس خبري اژانس سره په مرکې کړې دي.
هغه زیاته کړې: «روسیې په دوامداره توګه امریکا ته د دې مسئلې [د روسیې پر خاوره برید کې د مداخلې] په هکله خبر ورکړی دی.»
څو ورځې مخکې د روسیې د بهرنیو چارو وزارت ویاندې ماریا زاخارووا هم ویلي و چې اوکراین د لوېدیځو هېوادونو د پوځي سلاکارانو په همکارۍ د روسیې پر «کورسک» سیمه برید کړی دی.
نوموړې هغه مهال ویلي و: «امریکايي مزدورانو په انټرنېټ کې په نمایشي ډول د کرسک په سیمه کې د ماشومانو د لوبې ډګر ته څېرمه د اوکرایني ځواکونو د راکټ ویشتلو د موقعیت انځور خپور کړ.»
دا څرګندونې په داسې حال کې کېږي چې د اوکراین پوځ تېره میاشت له یو پراخ برید وروسته د روسیې د «کورسک» سیمې ته ننوتل.
اوکراین په دې سیمه کې شاوخوا ۱۰۰ د اوسېدو ځایونه نیولې دي.
تر دې مخکې د روسیې د دفاع وزارت اعلان کړی و چې په «کورسک» کې د جګړې له پېل راهیسې تر اته زره او ۲۰۰ ډېر اوکرایني سرتېري وژل شوي دي.
