۸صبح، کابل: د غبرګولي ۲۴مه په افغانستان کې د مور ورځ ده او دا ورځ داسې مهال را رسېږي چې افغان میندې له پراخو اقتصادي، ټولنیزو او کلتوري ستونزو سره مخ دي.
ځینو میندو یکشنبه د غبرګولي پر ۲۴مه ۸صبح ورځپاڼې ته وویل چې ژوند یې په وروستیو کلونو کې له ګڼو ننګونو سره مخ شوی او د کورنیو د لومړنیو اړتیاوو برابرول یې ورځنۍ اندېښنه ده.
هغوی وايي چې بېوزلۍ، بېکارۍ او اقتصادي ستونزو پر کورنیو فشار زیات کړی او ګڼې میندې اړې دي چې په محدودو امکاناتو له خپلو اولادونو پالنه وکړي.
په افغانستان کې روغتیايي خدماتو ته د میندو مناسب لاسرسی هم یوه ننګونه بلل کېږي او په ډېرو سیمو کې د درملنې اړین خدمات نه شته.
د اقتصادي او روغتیايي ستونزو ترڅنګ، ځینې میندې د کورني تاوتریخوالي له دوام، د ژوند له سختو شرایطو او رواني فشارونو شکایت کوي او وایي چې په ډېرو مواردو کې ښځې له اړین ملاتړه بې برخې دي.
په داسې حال کې چې نړیوالو بنسټونو په وار وار په افغانستان کې د ښځو او میندو د وضعیت په اړه اندېښنه څرګنده کړې او هغوی ته یې د روغتیايي خدماتو، ټولنیز ملاتړ او اقتصادي فرصتونو د ښه کولو پر اړتیا ټینګار کړی دی.
