۸صبح، کابل: د ایران د بهرنیو چارو مرستیال وزیر او د دغه وزارت د سوېلي اسیا برخې مشر سیدرسول موسوي ویلي چې د هرات په ګمرک کې د تېرې ورځې اورلګېدنې درانه زیانونه اړولي او په خبره یې، له دې وړاندې هم د پولې دواړو غاړو ته ورته پېښې شوې دي.
موسوي پنجشنبه د زمري پر ۲۵مه په خواله شبکې اېکس کې لیکلي چې تر ډېره په دا ډول پېښو کې سوداګر او خلک زیان ویني.
نوموړي زیاته کړې: «په وار وار مو له بېلابېلو لارو وړاندیز کړی چې له ګاونډيو هېوادونو په تېره بيا له افغانستان سره په سرحدي سيمو کې دې د بېړنيو مرستو برابرولو لپاره يو ځانګړى ميکانيزم رامنځته شي.»
د یادونې ده چې پرون د مازیګر شاوخوا ۴:۰۰ بجې د هرات ګمرک په ګودام کې اور ولګېد چې اته ساعته یې دوام وکړ.
د طالبانو تر کنټرول لاندې باختر خبري اژانس په هرات کې د طالب چارواکو له قوله راپور ورکړی چې اور د تخنیکي ستونزه لامله لګېدلی و.
په هرات کې سرچینو ویلي وو چې په دې پېښه کې سوداګرو ته میلیونونه ډالر زیان اوښتی دی.
