۸صبح، کابل: د طالبانو د ریاست الوزرا اقتصادي مرستیال ملا عبدالغني برادر د ازبکستان د لومړي وزیر له مرستیال جمشید خواجهیف او مل پلاوي سره د اقتصادي همکاریو پر پراختیا خبرې کړې دي.
د طالبانو مرستیال ویاند حمدالله فطرت یکشنبه د زمري پر ۴مه په خپرې کړې خبرپاڼې کې لیکلي چې په دې لیدنه کې دواړو غاړو پر اقتصادي همکاریو، سوداګرۍ، پانګونې او د ترانزیت پر پراختیا بحث کړی دی.
د خبرپاڼې له مخې، ملا برادر له ازبکستان سره د اړیکو پراختیا او ثبات، د دواړو اړخونو د اقتصادي ګټو تر څنګ د سیمهییز ثبات لپاره هم ګټور بللی دی.
نوموړي ویلي چې چمتو دي له شته وړتیاوو په ګټنې، له ازبکستان سره په بېلابېلو برخو کې اړیکې پياوړې او پراخې کړي.
د طالبانو د ریاست الوزرا اقتصادي مرستیال د «ګډ عمل پلان» پر ښه پلي کېدو ټينګار کړی او زیاته کړې یې ده چې دا د دواړو اړخونو ترمنځ د اقتصادي ودې په برخه کې مهم رول لوبوي.
په دې لیدنه کې ازبکستان ته له افغانستان څخه د صادراتي توکو د لېږدونکو وسایطو د تګ راتګ پر وړاندې د شته خنډونو لرې کول، د ترانزیتي زیربناوو د ظرفیت لوړول، د انرژۍ په برخه کې همکاري او د سیمهییزو هېوادونو بازارنو ته د افغانستان د کرنیزو، خوراکي او معدني توکو د صادرولو په برخه کې د اسانتیاوو پر برابرولو هم خبرې شوې دي.
