متقي: ازبکستان دې د قرارداد له مخې افغانستان ته برېښنا صادره کړي
۸صبح، کابل: کابل او د افغانستان په ځینو نورو ولایتونو کې د برېښنا د برچاویو په دوام کې د طالبانو د بهرنیو چارو وزارت سرپرست امیرخان متقي له ازبکستانه غوښتي، چې د قرارداد پربنسټ برېښنا صادره کړي.
امیرخان متقي یکشنبه د سلواغې پر دویمه نېټه کابل کې د افغانستان د کرنیزو محصولاتو د پراختیايي صندق د پرانیستو پرمهال هیلهمندي څرګنده کړې، چې د ازبکستان دولت به د هغه قرارداد له مخې چې له برېښنا شرکت سره یې لاسلیک کړی دی پر خپلو ژمنو عمل وکړي.
د طالبانو د بهرنیو چارو وزارت سرپرست بیا له ازبکستانه د برېښنا وارداتو د درېدو د لاملونو په اړه څه نه دي ویلي.
په همدې حال کې د کابل او ځینو نورو ولایتونو اوسېدونکي وایي، چې د برېښنا له دوامداره پرچاویو تر پوزې راغلي.
د ویلو ده، چې تېره اونۍ د برېښنا شرکت په ازبکستان کې د تخنیکي ستونزې له امله د دغه هېواد وارداتي برېښنا د پرې کېدو خبر وکړ.
