۸صبح، کابل: د هرات سیمهییزې سرچینې وايي چې په دغه ولایت کې د ولایتي شورا یو مخکېنی غړی په مرموز ډول وژل شوی دی.
سرچینو شنبه د مرغومې پر ۲۲مه، ۸صبح ورځپاڼې ته ویلي چې د «عبدالرحمان علیزي مرادي» په نوم دا مخکېنی وکیل د هرات په اړوندو کې د خپل کور مخې ته وژل شوی دی.
بل خوا علیزي ته نږدې سرچینې وايي چې نوموړی د خپلې وسلې د پاکولو پرمهال د ناپامۍ ډزې په پایله کې ژوند بایللی دی.
ورته مهال، یو شمېر سرچینې وایي چې دا پېښه مرموز وه او لا روښانه نه ده چې ایا هغه د ناپامۍ په ډزې لګېدلی او که په قصدي ډول وژل شوی دی.
د یادونې ده چې په دې وروستیو کې د هېواد په ځینو سیمو، په ځانګړې توګه هرات کې جنایي پېښې ډېرې شوې دي.
د هرات اوسېدونکي طالبان د دوی د امنیت په ټينګښت کې پر بېکفایتۍ تورنوي.
