۸صبح، کابل: د افغانستان د ملي امنیت پخواني رییس رحمت الله نبیل ویلي، چې کېدای شي د افغانستان مخکینی ولسمشر اشرف غني د طالبانو سلاکار شي.
د ملي امنیت پخواني رییس نن شنبه د غویي پر ۱۰ پر خپله فېسبوکپاڼه لیکلي، چې د اشرف غني ورور حشمت غني پاکستان کې د آی اېس آی له مسوولانو سره لیدلي دي.
ښاغلي نبیل په خپل دغه فیسبوکي پوسټ کې لیکلي: «حشمت غني پاکستاني لوري ته د اشرف غني د ځانګړي پیغام د لېږدولو تر څنګ، د طالبانو په حکومت کې د سلاکار په توګه د اشرف غني د بېرته راستنېدو په اړه او د طالبانو د حکومت د رسمیت پېژندلو او د افغانستان بانک د پیسو خوشي کولو لپاره د هغه پر اغېزمن والي بحث او تر یوه بریده هوکړه کړې ده.»
د افغانستان د ملي امنیت پخواني رییس ویلي: «په دې برخه کې د طالبانو د دریځ په اړه معلومات نشته.»
د ویلو ده، چې د افغانستان د ملي امنیت پخواني رییس رحمت الله نبیل د جمهوریت په دوره کې د اشرف غني له منتقدانو څخه و. هغه د مخکیني ملي امنیت له ریاست څخه هم له اشرف غني سره د سیاسي اختلاف له امله استعفا کړې وه.
هېواد ته د اشرف غني د بېرته ستنېدو په تړاو د ښاغلي نبیل څرګندونې په داسې حال کې دي، چې تر دې مخکې د اشرف غني ورور حشمت غني احمدزي رسنیو ته ویلي و، که افغانستان کې د ښاغلي اشرف غني شتون اغېزناک کېدای شي، هغه هېواد ته د بېرته ستنېدو غوښتونکی دی.