۸صبح، کابل: له افغان رسنیو د ملاتړ سازمان «نی» چې دا مهال په جلاوطنۍ کې فعالیت کوي، وايي چې په افغانستان کې داسې کوم ځانګړی قانون نه شته چې د بیان ازادۍ د ارزښتونو پر بنسټ د رسنیو فعالیت تنظیم او د هغوی د فعالیت چوکاټ تعریف کړي.
نوموړي بنسټ چهارشنبه د زمري پر ۲۱مه ویلي چې طالبانو د رسنیو د محدودولو لپاره څه باندې ۲۵ مستقیم سراسري حکمونه او لسګونه غیرمستقیم سیمهییز حکمونه صادر کړي دي.
د نی په خبره، دا لارښوونې په عملي ډول د رسنیو اړوند د طالبانو د قوانینو په توګه پلي کېږي او د ځانګړو قوانینو نشتوالي د رسنیو او رسنیزو بنسټونو حقوقي دریځ ناڅرګند کړی دی.
دغه بنسټ زیاته کړې چې طالبان په داسې شرایطو کې وخت ناوخت رسنۍ د جواز پر لغوه کولو او د مرکزونو پر تړلو ګواښي.
ني ویلي چې د طالبانو تر واک لاندې افغانستان د بیان ازادۍ او خپلواکو رسنیو له نشتوالي او خبریالان او رسنیز کارکوونکي له پراخو محدودیتونو سره مخ دي.
دغه بنسټ په افغانستان کې د رسنیو اوسنی وضعیت د اندېښنې وړ بللی او ویلي یې دي، هغه هېواد چې یو وخت یې د بیان ازادۍ او خپلواکو رسنیو په برخه کې یو څه ښه وضعیت لاره، اوس له پراخو محدودیتونو سره مخ دی.
