د ننګرهار د ولایتي شورا رییس: اسلام‌ آباد له طالبانو هراړخیز ملاتړ کوي

په افغانستان کې جګړې تر بل هر وخته زیات زور اخيستی او هره ورځ دواړو خواوو ته د لسګونه تنو د مرګ ژوبلې خبرونه خپرېږي.
د ننګرهار د ولایتي شورا رئیس احمد علي حضرت وايي چې پاکستان له طالبانو ملاتړ کوي او آن د جګړو په لیکو کې د طالبانو ترڅنګ پاکستانیان هم لیدل شوي دي.
د ننګرهار د ولايتي شورا رئیس څرګنده کړه: « ترڅو چې د پاکستان حکومت په پنجاب، لاهور او اسلام اباد کی وینه بهیدل ونه ګوري له افغانستانه لاس نه اخلي.»
دا په داسې حال کې ده، چې په دې وروستیو کې د قطر په پلازمېنه دوحه کې د افغان دولت او طالبانو د سولې مرکچې پلاويو ترمنځ ناستې پيل شوې دي او خلک یې هیله من کړي دي.
ځینې دا ناسته د لنډمهاله اوربند او بیا دایمې سولې لپاره ښه پېلامه بولي، خو یو شمېر نور بیا په دې نظر دي، چې دا وړ ناستې هېڅ درد نه دوا کوي او باید خلک پرې تېر نه ایستل شي.
په ایران کې د افغانستان سفیر عبدالغفور لېوال په خپله فیسبوک پاڼه لیکلي، چې په پردیو لوکسو تالارونو کې سولېدلې او بې ګټې خبرې د خلکو پر حالت، هیلو او غوښتنو تمسخر دی.
غفور لېوال وړاندې لیکلي: «دا دروغجن سیاسي ادبیات باید د سولې په رښتینو ادبیاتو داسې بدل شي او ووایي چې موږ ژمنه کوو، چې له (الف) تاریخ څخه بې قیدو شرطه اوربند کوو.
موږ عملي اقدام کوو، چې سرله ننه هېڅ ملي بنسټ او عامه وداني نه ړنګوو، نه یې لوټوو او هېڅ افغان انسان نه وژنو.
موږ ژمنه کوو، چې د ملي حاکمیت په چوکاټ کې ټول په یوه پیاوړي حکومت کې سره شریک کېږو، چې خلکو ته کار، ډوډۍ او وطن ته ملي او نړیوال حیثیت وروبښلی شي او وطن د هر بهرني «هربهرنی، لرې، نږدې، ګاونډی، مسلمان، کافر او هریو…» له لاسوهنو څخه خوندي شي.»
په ایران کې افغان سفیر لیکلي، چې تر دې هاخوا نصحیتونو، وعظونو، پندنامو او سیاسي موعظو، چې ترشا یې په عمل کې خلک وژل کیږي، وطن ویجاړیږي او د ګاونډیو استخبارات راننه ایستل کیږي، خپل اعتبار له لاسه ورکړی دی.
د افغان سولې او جګړې په مسئله کې هر مهال توندې نیوکې پر پاکستان وي، په همدې اساس د پښتون ژغورنې غورځنګ مشر منظور احمد پښتین ویلي، پاکستان تل په افغانستان کې منفي لاسوهنه کړې ده.
پښتین ویلي، چې په افغانستان کې د پاکستان منفي لاسوهنې په تېر تاریخ کې ټوله سیمه له بربادۍ سره مخ کړې ده او په باور يې دا ځل به يې هم پایله همدا ډول بربادي وي.
منظور پښتین زياته کړې چې، که هر ډول وي د پاکستان د دا ډول لاسوهنې مخنیوی اړین دی، ځکه دا سیمه ننګولی شي.
د قطر له دوحې راپورنه وايي چې د طالبانو د سیاسي دفتر مشر ملا عبدالغني برادر ویلي، د سولې له خبرو باید ولسونه ناهیلي نه شي.
ملا برادر ویلي، چې اوس خبرې حساس پړاو ته رسېدلي او هڅه دا ده، چې یوې هوکړې ته سره ورسېږي.
په دوحه کې د افغان پلاوي او د افغانستان د ملي روغې جوړې د عالي شورا رییس عبدالله عبدالله ویلي، جګړه د حل لاره نه ده او د روانې جګړې ګټونکي هم یوازې او یوازې افغان اولس دی.
د سیاسي چارو شنونکي د دواړو لوریو څرګندونې، هغه تکراري سیاسي عبارتونه بولي، چې وايي اوس هېڅ رنګ نه دی ورپاتې او که لوري غواړي اولس ته ځان ثابت کړي باید کړې ژمنې عملي کړي.