د ناسا «NASA» کوچنۍ چورلکې پر مریخ بريالۍ الوتنه وکړه

پر مريخ د ناسا له لورې د «Ingenuity» په نامه کوچنۍ چورلکې په برياليتوب سره الوتنه وکړه او خپل لومړنی تصوير يې مخابره کړ. دغه چورلکه څه کم يوه دقيقه په هوا کې وه او پر مريخ يې خپله لومړنۍ ازمايښتي الوتنه په پوره بريالیتوب سره وکړه.
د دغه ماموريت څخه د ناسا موخه په سرې سيارې «مريخ» کې د ژوند کولو د نښو او نښانو پيدا کول دي.
دا لومړی ځل دی چې د امريکا فضايي اداره يا ناسا له بلې سيارې څخه کنټرولېدونکې چورلکې ته الوتنه ورکوي.
ميمي اينګ د دې پروژې مديرې څرګنده کړه، اوس موږ ويلی شو چې انسانانو پر بله سياره باندې يوې چورلکې ته الوتنه ورکړې ده. دغه چورلکه ډېره سپکه جوړه شوې او او وزرې ډېر ژر ژر څرخېږي.
د دغې پروژې د مسولينو په وينا دغه الوتنه شاوخوا درې متره لوړه ترسره شوه او د «رايټ ورونو» د الوتنې په اندازه د اهميت او ارزښت وړ ده او تمه ده چې راتلونکې الوتنې له اوږد واټن څخه ترسره شي.