۸صبح، کابل:په ملګرو ملتونو کې د افغانستان دایمي استازي نصیر احمد فایق په افغانستان کې د طالبانو د سیستماتیکو ځپلو او تبعیض د پای ته رسولو، د خلکو، په ځانګړې توګه د ښځو او نجونو د اساسي حقونو د بېرته خونديتوب او د عدالت او حسابورکونې د ټینګښت غوښتنه کړې ده.
فایق شنبه د لړم پر ۹مه، پر خپله ایکسپاڼه لیکلي چې د ملګرو ملتونو په عمومي اسامبله کې د بشري حقونو د شورا د راپور په اړه د افغانستان په وینا کې یې په هېواد کې د بشري حقونو وضعیت ته د رسېدنې پر اړتیا ټینګار کړی دی.
هغه د افغانستان لپاره د ملګرو ملتونو د ځانګړي راپور ورکوونکي ریچارد بېنېټ د خپلواکې څارنې د ملاتړ او په هېواد کې د بشري حقونو د سرغړونو د څېړلو لپاره د یوه خپلواک څېړنيز میکانېزم د فعالیت د ژر پيلېدو غوښتنه کړې ده.
په ملګرو ملتونو کې د افغانستان دایمي استازولۍ هم د عدالت او حسابورکونې پر ټینګښت ټینګار کړی او ویلي یې دي چې د بشري حقونو د سرغړونو عاملان باید له سزا معاف پاتې نه شي.
فایق زیاته کړې چې له طالبانو سره د نړیوالې ټولنې تعامل باید پر اصولو ولاړ وي او د بشري حقونو په برخه کې د سنجولو وړ پرمختګونو پورې مشروط وي. د هغه په وینا، دغه تعامل باید د ځپنې او د ټولنې د بېلابېلو ډلو د حذفولو د عادي کېدو لامل نه شي.
نوموړي همداراز د بشري مرستو پر دوام، د افغان کډوالو پر ملاتړ او د پناهغوښتونکو د جبري ستنولو د منع اصل پر رعایت ټینګار کړی دی.
نصیر احمد فایق ټینګار کړی چې د افغانانو حقونه د معاملې وړ نه دي او د بشري حقونو په برخه کې نړیوالې ژمنې باید پر عملي اقداماتو بدلې شي.
