۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق په ټولو سیاسي بهیرونو لکه دوحې بهیر کې د افغان ښځو د برابر ګډون او د ښځو او نجونو پرمخ د ښوونځيو او پوهنتونونو د پرانیستلو غوښتنه کړې ده.
فایق یکشنبه د لړم پر ۱۰مه په اېکس پاڼه کې لیکلي چې د ښځو، سولې او امنیت په اړه یې د ملګرو ملتونو د امنیت شورا په ناسته کې ټينګار کړی چې د ښځو له ګډون پرته سوله تلپاتې نه وي.
نوموړي په سیاسي بهیرونو کې د ښځو ماناداره، خوندي، برابر او بشپړ ګډون لپاره د لارې چارې د برابرېدو غوښتنه کړې او ټينګار یې کړی چې د ښځو حقوق دې د چنې وهلو وسیله نه ګرځي.
فایق همداراز د جنسیت پر بنسټ د ځورونې او تعقیب او له بشري حقونو د نورو جدي سرغړونو په تړاو د حساب ورکولو پر اصل ټینګار کړی او د قربانیانو د خوندیتوب غوښتنه یې کړې ده.
په ملګرو ملتونو کې د افغانستان د دایمي استازولۍ سرپرست د ښځو په مشرۍ له بنسټونو سره د مالي مرستو او همدارنګه د بشري حقونو د ښځینه مدافعانو د خوندیتوب غوښتنه هم کړې ده.
فایق ویلي، له طالبانو سره تعامل دې د ښځو ځپل او له ټولنې د هغوی ګوښه کول عادي نه کړي او تلپاتې سوله د افغانانو په ارادې او حقوقو ولاړې مشروع، ټولګډونې او ځوابویونکې حکومتولۍ ته اړتیا لري.
