۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق وایي چې د قانون واکمني مشروع او ځواب ویونکي حکومت ته اړتیا لري او هغوی چې واکمن دي، باید خپله هم د قانون تابع وي.
فایق جمعه د تلې پر ۱۷مه د ملګرو ملتونو د عمومي غونډي په شپږمه کمېټه کې ویلي چې د قانون واکمني یوازې د فرمانونو په ورکولو او د محاکمو تر شتونه محدوده نه ده.
هغه زیاته کړې چې د طالبانو له لوري د اساسي قانون، حقوقي او قضایي ضمانتونو له منځه وړلو، د واک خپلسرې کارونې، تبعیض او له حقونو سرغړونې ته لار برابره کړې ده.
فایق د ښځو پر برابرو حقونو، عدالت ته د لاسرسي او په پلي کولو کې یې د بشپړ ګډون پر حق هم ټينګار کړی دی.
نوموړي په افغانستان کې د تبعیضي اقداماتو د ختمولو او له حقوقي او قضایي فعالانو او د بشري حقونو له مدافعانو د ملاتړ غوښتنه کړې ده.
په ملګرو ملتونو کې د افغانستان د دایمي استازولۍ سرپرست ویلي چې د تلپاتې سولې لپاره مشروع، د خلکو استازي او ځواب ویونکۍ حکومت ته اړتیا ده؛ داسې چې د افغانانو په مشرۍ او مالکیت د یوه سیاسي بهیر له لارې رامنځته شي.
د فایق په خبره، دا بهیر دې د ملګرو ملتونو د بنسټ د ملاتړ او اسانتیا برابرولو ترڅنګ، د ښځو، مدني ټولنې، ډیموکراټیکو ځواکونو او د افغانستان د نورو معتبرو لورو له ګډون سره مل وي.
