۸صبح، کابل: د «ازبکي ژبې د ملي ورځې» په مناسبت د امریکا په فیلادلفیا ښار کې یوه کلتوري او ادبي غونډه جوړه شوه چې کلتوري شخصیتونو، هنرمندانو، شاعرانو او په امریکا کې د مېشتې افغان ټولنې غړو پکې ګډون کړی و.
دا غونډه يکشنبه د تلې پر ۲۶مه، د تیمور کلتوري او ټولنیزې ټولنې په نوښت جوړه شوې وه. د غونډې موخه د ازبکي ژبې ساتنه، د افغانستان د ازبکانو د کلتوري او ادبي میراث معرفي کول او راتلونکو نسلونو ته د کلتوري ارزښتونو لېږدول وو.
د انډیانا پوهنتون استاد پروفیسور ډاکټر نظیف شهراني په دې غونډه کې د افغانستان د ازبکانو او ترکمنانو د تاریخ او ځای او د تاریخي او کلتوري هویت په ساتنه کې د ازبکي ژبې د رول په اړه وینا وکړه.
د موسیقۍ په برخه کې هم د فرهاد دریا، خیرمحمد چاووش او سیدکبیر کمال په ګډون يو شمېر هنرمندانو سندرې وویلې.
د شعرونو دکلمې، د ماشومانو ادبي پروګرامونه او د ازبکي دودیزو خوړو او جامو نندارتون هم د دې مراسمو نورې برخې وې.
د مراسمو په پای کې، د کلتوري او ټولنیزو برخو په برخه کې د هڅو له امله د تیمور کلتوري او ټولنیزې ټولنې له هنرمندانو، همکارانو او فعالو غړو څخه ستاینه وشوه.
