ناټو یو ځل بیا له افغان ځواکونو سره د خپلو مرستو پر دوام ټينګار وکړ

د ناټو یا شمالي اتلانتیک سازمان سرمنشي ینس ستولټنبرګ د استونیا له لومړۍ وزیرې کایا کالاس سره په لیدنه کې ویلي، چې له افغانستانه د دغه سازمان د سرتېرو پر وتلو او په هېواد کې د سولې له هڅو ملاتړ کوي.
د ناټو سرمنشي د غبرګولي په څلورمه په دغه سازمان کې د استونیا د لومړۍ وزیرې کایا کالاس کوربه و. نوموړي له کایا کالاس سره ګډې خبري ناستې ته ویلي، چې له افغانستانه د دغه سازمان د سرتېرو د وتلو لړۍ په ښه او پوره همغږۍ پر مخ ځي او ناټو به له افغانستان سره مرستو ته دوام ورکوي.
د ناټو عمومي منشی ټينګار کړی، چې د ناټو ځواکونو له وتلو سره سره به دغه سازمان له افغان امنیتي ځواکونو ملاتړ کوي.
ستولټنبرک ویلي، چې ناټو سازمان به په افغانستان کې د سولې د ټینګښت په موخه له افغانانو سره مرسته وکړي.
د ناټو د سرمنشي په خبره، دغه سازمان به له افغانستانه د خپلو ځواکونو له وتلو وروسته هم د افغان امنیتي ځواکونو روزنې، ملاتړ او مالي مرستې ته دوام ورکړي.
همداراز ینس ستولټنبرګ د غويي په ۳۱مه په پاریس کې د فرانسې له ولسمشر امانوئل مکرون سره په کتنه کې ویلي و، چې ناټو به له افغانستانه د دغه سازمان د ځواکونو له وتلو وروسته په درېیو برخو کې له دغه هېواد سره خپلو همکاريو او مرستو ته دوام ورکوي.
دغه درې برخې، له افغان امنیتي ځواکونو دوامداره مالي ملاتړ او مشوره، له افغانستانه بهر ځانګړو ځواکونو ته د زده کړو زمینې برابرول او د کابل د نړیوال هوایي ډګر د بودیجې برابرول ښودل شوي دي. افغان دولت د ناټو له دغې پرېکړې ملاتړ کړې دی. ناټو له دې مخکې هم ژمنه کړې، چې تر ۲۰۲۴ کال پورې به له افغان امنیتي ځواکونو سره خپلو مرستو ته دوام ورکړي.