د اسټراليا او ويسټ انډيز سره د روان کال په اکتوبر مياشت کې شل اوريزه سيالۍ ترسره کېږي او تر راتلونکو دوو اونیو پورې به د شل اوريزه سياليو لوبډلمشر هم اعلان شي.
د افغانستان کرکټ بورډ رئيس فرهان يوسفزی وايي چې افغان کرکټ ملي لوبډله به د روان کال په اکتوبر مياشت کې د اسټراليا او ويسټ انډيز کرکټ ملي لوبډلو سره ۲۰ اوريزې سيالۍ ترسره کړي.
د دغه لوبو ځای لا تر اوسه نه دی څرګند شوی.
فرهان يوسفزي چې نن يې کرکټ بورډ کې په يوه خبري کنفرانس کې خبرې کولې وويل، چې تر راتلونکو دوو اونيو پورې به د شل اوریزو فارمټ لپاره نوی لوبډلمشر هم اعلان شي.
کرکټ بورډ څه موده مخکې ځوان لوبغاړی حشمت الله شهيدي د افغانستان کرکټ لوبډلې پنځوس اوريزو او ټېسټ فارمټونو لپاره د نوي لوبډلمشر په توګه وټاکه.
يوسفزي زياته کړه چې د افغانستان سوداګريز کرکټ ليګ يا APL سيالۍ به هم د راتلونکې کال په فبرورۍ مياشت کې ترسره شي.
د کرکټ بورډ رئيس دغه څرګندونې په داسې وخت کې کوي چې د افغانستان کرکټ سوداګريزې سيالۍ يا APL شاوخوا درې کاله کېږي چې نه دي ترسره شوي او له دې امله د کرکټ څارونکو او مينه والو لخوا هر وخت نيوکې کېږي.
په ورته وخت کې افغان کرکټ لوبډلې د کرونا لومړۍ څپې راهيسې تر دې دمه کومې د پام وړ لوبې له نورو هېوادونو سره نه دي ترسره کړي او د کرکټ لوبډلې يو شمېر لوبغاړي يوازې په شخصي سوداګريزو ليګونو کې لوبېږي.
تمه ده د سږ کال ۲۰ اوريزه کرکټ نړېوال جام هم عمان او متحده عربي اماراتو کې د IPL ليګ له پايته رسېدو ۲ ورځې وروسته پيل شي.
افغانستان په دغه جام کې شامل دی او له مختلفو هېوادونو سره به مخامخ شي.
نړيوال جام به په دوو پړاوونو کې د اکتوبر په ۱۷مه عمان کې پيل او د نومبر په ۱۴مه پايته ورسيږي.
د شل اوريزو نړيوال جام څخه وړاندې افغانستان له پاکستان سره د ۳ پنځوس اوريزو لوبو کوربتوب هم کوي چې په همدې مياشت کې به د هند کرکټ غوره ليګ IPL پاتې لوبې هم په متحده عربي اماراتو کې ترسره شي.
د هند غوره ليګ کې د افغانستان کرکټ ملي لوبډلې درې لوبغاړي هر يو راشد خان، محمد نبي او مجيب الرحمن هم اخيستل شوي چې د سنرايزر حيدراباد لوبډلې سره لوبېږي.
دغه سيالۍ څه موده وړاندې په هند کې پيل شوې چې په ياد هېواد کې د کرونا درېيمې څپې له چټکې خپرېدا وروسته وځنډول شوې.