ننګرهار کې یوه ډله ځوانانو نوښت کړی او ګرځنده کتابتون يې پرانیستی، دوی دغه ګام د دې لپاره اوچت کړی څو ځوانانو کې د کتاب لوستنې کلتور ژوندی کړي.
دا ګرځنده کتابتون یوه کوچني موټر کې جوړ شوی، چې پر شاوخواوو يې ښکلي پيغامونه هم لیکل شوي دي.
د دې کتابتون جوړېدو نوښت کامه کې د هېواد خیریه بنسټ په نوم یوې ټولنې کړی، چې مشري يې د الهام یاسیني په نوم یو شخص کوي.
الهام یاسیني ۸صبح ورځپاڼې ته وويل، چې دې کتابتون کې د مصر هېواد ډېر تاریخي کتابونه هم شته، چې د دغه هېواد د سفارت په مرسته يې رالېږدولي دي.
یاسیني وویل: «مصر کې د دوکتور محمدآمان کتابتون ؤ چې کتابونه يې د سفارت له لارې مونږ ته راواستول. د دې ګرځنده کتابتون پرانیسته مونږ څو ورځې مخکې وکړه. موخه مو د مطالعې فرهنګ دودول دي».
هغه وايي، د دې ګرځنده کتابتون اصلي کار به دا وي، چې پر ښوونځیو به ګرځي او زده کوونکو ته به د هغوی د سويې مطابق کتابونه د لوست په موخه ورکوي.
الهام زياته کړه، غواړي د دې کتابتون فعالیتونه نورو ولسوالیو ته هم وغځوي، خو په خبره يې که نور څوک دا وړ کتابتون جوړول غواړي نو دوی ورسره مرسته کوي.
د دې کتابتون پرانیستې پر فېسبوک، ټوېټر او نورو ټولنیزو پاڼو کې د خلکو پام را اړولی او بېلابېلې تبصرې پرې شوې دي.
ننګرهار کې د عبدالصیرسباوون په نوم يو ځوان چې ډېرو بې وزله ځوانانو ته يې د زده کړو زمينې برابرولو کې مرسته کړې، د دې کتابتون پرانیسته نوښت او نیک اقدام ګڼي.
سباوون له ۸صبح ورځپاڼې سره په خبرو کې وويل، دا هڅه په ټولنه کې د کتاب لوستنې او کتاب ته د خلکو پام را اړولو کې ډېره پرځای ده او ګڼ شمېر ځوانان به کتاب لوستنې ته وهڅېږي.
هغه زياته کړه: «اوس له بده مرغه د کتاب لوستنې فرهنګ کم شوی، دا هڅې د کتاب لوستنې فرهنګ ژوندی کولی شي. دا کتابتون باید داسې عیار شي چې ډېر او د خلکو د پام وړ کتابونه په کې ځای شي او همداراز نورو ولسوالیو او ولایتونو کې هم د دا ډول هڅو پيل باید وشي».
د ټولنیزو رسنیو یو فعال وحید زهیر لیکلي: «دا ګرځنده کتابتون په څومره ښه سلیقه تیار او برابر شوی دی. د هېواد خیریه بنسټ د دې بهترین کار زه ډېر قدر کوم».
عارف الله ځلاند د فېسبوک بل کاروونکي دغه نوښت په ځینو نورو خوږو تورو ستایلی دی، چې په خبره يې ډېر پرځای اقدام دی. هغه په خپله پاڼه لیکلي: «اوس به لخيره دې سوزکۍ کې کېنو، کامه کې تر څو یو چکر وهو نو د یو کتاب مطالعه به مو کړې وي».
د کتاب لوستنې په برخه کې تر دې وړاندې لغمان ولايت کې هم د ادریس سیاوش په نوم يو ځوان د بایسکل پر مټ د کتاب لوستنې فرهنګ دودولو لړۍ پيل کړې وه. نوموړي د کابل په ګډون یو شمېر ولایتونو ته سفرونه وکړل.
اوس مهال ټولنیزو رسینو ته د خلکو اسانه لاسرسي په ټولنه کې د کتاب لوستنې فرهنګ ډېر پېکه کړی او که څوک غواړي مطالعه وکړي، پر انټرنيټي پاڼو د خپلې خوښې وړ مضمون لټوي.
د روان پوهني یو شمېر لارویان وايي، د انټرنيټي پاڼو پر ځای د کتاب مطالعه څو چنده غوره او په ذهنونو کې پاتې کېږي، نو د همدې لپاره باید مطالعه له کتابه وشي.
