نیکلاسن: که طالبان بدلون ونه کړي، بندیز یو انتخاب دی
۸صبح، دوشنبه: د هرات د امنیتي ناستې په شپږمه غونډه کې د افغانستان لپاره د اروپایي ټولنې ځانګړي استازي ویلي، چې که طالبان بدلون ونه کړي د جرمونو له نړیوالې محکمې اقدام او پر دغه ډلې بندیز لګول کولای شي د دې ټولنې انتخاب وي.
ټامس نیکلاسن دغه څرګندونې چهارشنبه د لیندۍ پر شپږمه نېټه د تاجکستان په پلازمېنه دوشنبې ښار کې د هرات د امنیتي ناستې پر دویمه ورځ بیان کړې دي.
هغه زیاته کړې: «که هغوی (طالبان) د خلکو بنسټیزو حقونو ته پام ونه کړي، موږ ان کولای شوو د جرمونو د نړیوالې محکمې له لارې او د طالبانو پروړاندې د بندیزونو په لګولو سره اقدام وکړو.»
د هرات د امنیتي ناستې شپږمه غونډه د «افغانستان؛ نړیوال مسوولیت؛ د ملګروملتونو سازمان رول» تر نامه لاندې روانه ده.
نیکلاسن په دې غونډه کې څرګنده کړې، چې طالبان باید افغانانو ته ځواب ووایي او د بنسټیزو او اړینو خدماتو د وړاندې کولو وړتیا ولري.
د اروپایي ټولنې دغه چارواکي جوته کړې، چې د یوه ثبات لرونکي افغانستان د رامنځته کولو لپاره یوه جدي او اوږدمهاله راژوندي کوونکي بهیر ته اړتیا ده او طالبان مسوولیت لري، چې نړیوالو قوانینو ته د دغې ډلې د ژمنو له مخې د افغانانو حقونو ته پام وکړي.
دا څرګندونې په داسې حال کې مطرح شوې دي، چې طالبانو تل د افغانانو په ځانګړې توګه د ښځو د حقونو د رعایت ادعا کړې ده.
