۸صبح، کابل: د افغانستان د بشري حقونو خپلواک کميسيون ويلي چې د روان کال د وري مياشتې له ۲۲مې څخه د همدې مياشتې تر ۲۶مې نېټې پورې ۷۹ ملکي وګړو ته په ۱۲ جلا جلا پېښو کې مرګژوبله اوښتې ده.
ياد کميسيون نن دوشنه «د وري ۳۰مه نېټه» ويلي چې يادې پېښې په فراه، ننګرهار، کندهار او پروان ولايتونو کې شوې دي چې د چسپکي ماين او د سړک د غاړې ماين د چاودونو له امله رامنځته شوې دي. د دې کميسيون په وينا په دغو ۷۹ کسانو کې ۳۹ يې مړه شوي او ۴۰ تنه ټپيان شوي دي.
د بشري حقونو خپلواک کميسيون د معلوماتو له مخې په يادو قربانيانو کې ښځې، ماشومان او نارينه شامل دي.
ياد کميسيون د دغو پېښو عاملين وسلهوال طالبان او ناپېژندل شوي کسان بللي دي، خو وسله والو طالبانو لا تر دې دمه په دې اړه څه نه دي ويلي.
د بشري حقونو خپلواک کميسيون يو ځل بيا په هېواد کې د فوري اوربند د ټينګښت او د تاوتريخوالي په کمېدو ټينګار کړی دی.
په هېواد کې د ملکي وګړو د مرګژوبلې په اړه دغه شمېرې داسې مهال خپرېږي چې د سولې د ټينګېدو او د اوربند رامنځته کېدو په اړه هيلې له بل هر وخته ډېرې شوې دي.
