۸صبح، کابل: د ملګرو ملتونو د بشري مرستو د همغږۍ دفتر (اوچا) اعلان کړی دی چې په افغانستان کې ۳.۷ میلیونه ماشومان له سختې خوارځواکۍ سره مخ دي.
اوچا دوشنبه د غبرګولي پر ۲۵مه راپور ورکړی چې په افغانستان کې به میلیونونه ماشومان پر سختې خوارځواکۍ اخته شي، چې دا وضعیت د بشري مرستو د سمدستي زیاتوالي بېړنۍ اړتیا په ګوته کوي.
د راپور له مخې، د انساني تلفاتو د نه جبرانېدونکو پایلو د مخنیوي لپاره په بېړني ډول د مالي ملاتړ زیاتوالی او د تغذیې د پروګرامونو پلي کول خورا اړین دي.
اوچا زیاته کړې چې په هېواد کې د اړتیاوو کچه خورا لوړه ده او د زیانمنو شویو ماشومانو له منځه به د سختې او خطرناکې خوارځواکۍ په سلګونو زره پېښې ثبت شي.
دغه راز په دغه راپور کې راغلي چې په ۲۰۲۶ کال کې شاوخوا ۱.۲ میلیونه امیندواره او شیدې ورکوونکې میندې هم د دغه ناورین له امله اغېزمنې کېږي.
