۸صبح، کابل: د خوړو نړیوال پروګرام (WFP) اعلان کړی چې افغان میندې او ماشومان د خوارځواکۍ د مخ په پراخېدونکي ناورین په لومړۍ کرښه کې دي.
دغه سازمان د شنبه د غويي پر ۲۶مه، راپور ورکړی چې افغانستان اوسمهال د خوارځواکۍ د تر ټولو لوړې کچې د ثبتېدو په درشل کې دی او نږدې پنځه میلیونه میندې او ماشومان بېړنیو مرستو ته اړتیا لري.
د راپور له مخې، دا ناورین په افغانستان کې د اقتصادي فشارونو، سیمهییزو ترینګلتیاوو، د کډوالو د پراخې راستنېدنې او د بشري مرستو د سخت کموالي له امله لا پسې سخت شوی دی.
دغه سازمان همداراز خبرداری ورکړی چې د منځني ختیځ د جګړې پایلو، له هغې ډلې د تېلو د نړیوالې بیې لوړېدو او د لېږد رالېږد د لارو ګډوډېدو، په افغانستان کې زرګونه کسان له حیاتي مرستو بېبرخې کړي دي.
دا په داسې حال کې ده چې تر دې وړاندې هم ملګرو ملتونو خبرداری ورکړی و چې افغانستان په ۲۰۲۶ کال کې بېړنیو بشري مرستو ته اړتیا لري.
د ملګرو ملتونو د ماشومانو د ملاتړ صندوق (یونیسف) ویلي چې په روان کال کې، شاوخوا ۲۱.۹ میلیونه کسان چې د افغانستان د نفوس نږدې ۴۵ سلنه کېږي، بشري مرستو ته اړتیا لري.
