۸صبح، کابل: د ملګرو ملتونو د بشري مرستو د همغږۍ دفتر (اوچا) اعلان کړی چې د افغانستان په ۲۶ ولایتونو کې د خوارځواکۍ کچه د ۲۰۲۵ کال پرتله بدتره شوې ده.
اوچا دوشنبه د غبرګولي پر ۲۵مه راپور ورکړی چې په ۲۰۲۶ کال کې په افغانستان کې د تغذیې وضعیت په اندېښمنوونکې توګه د خرابېدو پر لور روان دی او د هېواد په بېلابېلو برخو کې د خوارځواکۍ کچه لوړه شوې ده.
د راپور له مخې، ۱۲ولایتونه چې هلمند، ډایکنډي، زابل، بغلان، اروزګان، پکتیکا، نورستان، سرپل، غور، کندهار، فاریاب او لوګر پکې شامل دي، په کړکېچن وضعیت کې دي.
دغه سازمان زیاته کړې چې له شپږو میاشتو کم عمر لرونکي نږدې ۴۰ سلنه نوي زېږېدلي ماشومان د سختې خوارځواکۍ او طبي اختلاطاتو له امله د درملنې لپاره په روغتونونو کې بستر کېږي؛ هغه موضوع چې پر روغتیایي خدمتونو او د کم عمره ماشومانو پر وضعیت یې سخت فشار راوستی دی.
اوچا خبرداری ورکړی چې تر دوو کلونو کم عمره ماشومان تر ټولو ډېر زیانمن شوي، داسې چې د سختې خوارځواکۍ ۸۳ سلنه پېښې او د منځنۍ خوارځواکۍ ۷۷ سلنه پېښې په هغوی پورې تړاو لري او دغه راز د منځنۍ خوارځواکۍ شاوخوا ۱۹ سلنه پېښې هم په لوړ خطر لرونکي وضعیت کې دي.
