۸صبح، کابل: د ملګرو ملتونو د بشري مرستو د همغږۍ دفتر (اوچا) خبرداری ورکړی چې په ۲۰۲۶ کال کې د بودیجې کمښت په افغانستان کې د ۵.۷ میلیونه ماشومانو او میندو لپاره د تغذیې د پروګرامونو دوام له ګواښ سره مخ کوي.
دغه بنسټ يکشنبه د زمري پر ۴مه، پر خپله ایکسپاڼه لیکلي چې که مالي سرچینې ژر ونه موندل شي، په افغانستان کې میلیونونه کسان ښايي اړینو روغتیايي او تغذیوي خدمتونو ته خپل لاسرسی له لاسه ورکړي.
اوچا ټینګار کړی چې د بوديجې کمښت به د بشري مرستندويو بنسټونو وړتیا راکمه کړي، څو د خلکو، په ځانګړې توګه د تغذیې په برخه کې بېړنیو اړتیاوو ته رسيدګي وکړي.
تر دې وړاندې اوچا په یوه راپور کې ویلي وو چې په ۲۰۲۶ کال کې په افغانستان کې د تغذیې وضعیت د اندېښنې وړ دی او د هېواد په بېلابېلو برخو کې د خوارځواکۍ کچه لوړه شوې ده.
