۸صبح، کابل: د ملګرو ملتونو د بشري مرستو د همغږۍ دفتر (اوچا) وايي، د ۲۰۲۶ کال له جنورۍ تر اګست پورې بشري مرستندویو بنسټونو په افغانستان کې ۹.۳ میلیونه کسانو سره لږ تر لږه یو ډول مرسته کړې ده.
اوچا سه شنبه د لړم پر ۱۲مه، په یوه راپور کې ویلي چې له دغو کسانو ۱.۴ میلیونه یې په درېیو یا تر هغو ډېرو برخو کې بشري مرستې ترلاسه کړې دي.
د راپور له مخې، ۵.۱ میلیونه کسانو چې د مرستو د ترلاسه کوونکو ۵۵ سلنه جوړوي، خوراکي مرستې ترلاسه کړې دي.
اوچا وايي، دغه شمېرې په افغانستان کې د خوړو د سختې ناامنۍ پراختيا ښيي او د بشري مرستو لویه برخه د خوراکي توکو برابرولو ته ځانګړې شوې ده.
خو د اوچا په وینا، لا هم ۱.۲ میلیارده ډالره، چې د اړتیا وړ ۱.۷۱ میلیارده ډالرو لومړنۍ بودیجې ۷۰ سلنه جوړوي، نه دي برابر شوي.
اوچا د بودیجې د ژر تر ژره برابرولو غوښتنه کړې، څو حیاتي مرستې هغو کسانو ته ورسېږي چې تر ټولو ډېره اړتیا ورته لري.
