۸صبح، کابل: د ملګرو ملتونو د بشري مرستو د همغږۍ دفتر (اوچا) د ژمي په درشل کې په کندوز کې د ۷۶۰ راستنو شویو کورنیو د سخت وضعیت په اړه اندېښنه څرګنده کړې ده.
اوچا چهارشنبه د لړم پر ۲۷مه په یوه راپور کې ویلي چې دغه کورنۍ د کندوز ښار په شاوخوا سیمو کې په خېمو او لنډمهالو سرپناه ځایونو کې ژوند کوي.
د دغه بنسټ په خبره، یادې کورنۍ لا هم خوراکي توکو، د څښاک پاکو اوبو، کمپلو، بخاریو او کافي سونتوکو ته لاسرسی نه لري.
د اوچا ویاندې اولګا چروکو ویلي چې د ژمي له رارسېدو مخکې دغو کورنیو ته د بېړنیو مرستو رسول اړین دي.
د یاد دفتر په خبره، د دغو کورنیو ډېرې یې نږدې دوه کاله وړاندې له ګاونډیو هېوادونو راستنې شوې او تېر ژمی یې په لوږې او ناروغۍ تېر کړی دی.






