۸صبح: نړیوال بانک په افغانستان کې د خوږو اوبو د زېرمو د کمېدو او د ځمکې لاندې اوبو د بې کچې ایستلو په اړه خبرداری ورکړی دی.
دغه بانک چهارشنبه د لړم پر ۲۷مه ویلي چې افغانستان له ۲۰۰۳ کال راهیسې هر کال د خوږو اوبو شاوخوا ۴.۹ میلیارده متر مکعب زېرمې له لاسه ورکړې دي.
د نړیوال بانک په خبره، دغه حالت په هېواد کې د اوبو د کمښت کړکېچ او اوبو ته د لاسرسی ستونزې لا پسې پراخوي.
دغه بنسټ زیاته کړې چې په کابل کې د ځمکې لاندې اوبو د ایستلو کچه د طبیعي بېرته پوره کېدو څخه نږدې څلور برابره زیاته ده.
نړیوال بانک ټینګار کړی چې د اوبو کمښت د کلیوالي سیمو د اوسېدونکو اقتصادی حالت هم ګواښي.
د دغه بنسټ د معلوماتو له مخې، د هېواد ۴۶ سلنه کاري ځواک پر کرنې بوخت دی او د افغانستان ۹۵ سلنه مصرفېدونکې اوبه یې ځان ته ځانګړې کړې دي.






