۸صبح، کابل: د ملګرو ملتونو د بشري مرستو د همغږۍ دفتر (اوچا) وايي چې ماشومان په افغانستان کې د ناچاودو مهماتو له امله د رامنځته شوې مرګ ژوبلې ۷۸ سلنه جوړوي.
اوچا چهارشنبه، د تلې پر ۱۵مه، ویلي چې د ماشومانو د دغې مرګ ژوبلې کچه د ۲۰۲۶ کال له جنورۍ تر اګست پورې ثبت شوې ده.
دغه دفتر زیاته کړې چې د ناچاودو مهماتو د ګواښ د له منځه وړلو لپاره د افغانستان د ۲۰۲۶ کال د بشري مرستو د پروګرام په چوکاټ کې ۱۴.۵ میلیون ډالرو ته اړتیا ده.
د اوچا په وینا، تر اوسه د دغو پيسو یوازې ۴.۳ میلیون ډالر برابر شوي دي.
اوچا خبرداری ورکړی چې د بودیجې د کمښت دوام د ناچاودو مهماتو د خطرونو د کمولو او له زیانمنو شویو کسانو سره د مرستې په برخه کې د بشري فعالیتونو وړتیا محدودوي.
