۸صبح، کابل: د ملګرو ملتونو د بشري مرستو د همغږۍ دفتر (اوچا) اعلان کړی چې تورخم ته نږدې تازه نښتې د ملکي وګړو په ګډون د بشري مرستو د کارکوونکو ژوند له خطر سره مخ کوي.
دغه دفتر جمعه د لړم پر ۸مه، په یوه راپور کې ویلي چې د چهارشنبې ورځې په نښتو کې یو ماشوم وژل شوی او د بشري مرستو یو کارکوونکی ټپي شوی دی.
اوچا ویلي چې په دې سیمه کې پرلهپسې نښتې د سیمې د اوسېدونکو امنیت هم ګواښي.
دا نښتې په داسې حال کې دوام لري چې له پاکستانه راستنېدونکي افغانان د تورخم له لارې افغانستان ته راځي.
اوچا خبرداری ورکړی چې په دې سیمه کې د نښتو دوام به ملکي وګړي له لا ډېرو خطرونو سره مخ کړي.
دا څرګندونې په داسې حال کې کېږي چې له پاکستانه د افغان وګړو د بېرته ستنېدو او جبري ایستلو بهیر دوام لري او هره ورځ ګڼې کورنۍ د تورخم له لارې هېواد ته راستنېږي.
