۸صبح، کابل: د ملګرو ملتونو د بشري مرستو د همغږۍ دفتر (اوچا) له افغانستان سره د کویت د ۲.۵ میلیونه ډالرو مرستې خبر ورکړی دی.
اوچا سه شنبه د لړم پر ۵مه، په یوه پیغام کې ویلي چې د کویت صندوق دغه پیسې د افغانستان د بشري مرستو له صندوقه د ملاتړ لپاره ځانګړې کړې دي.
اوچا زیاته کړې چې له ۲۰۲۴ کال راهیسې د کویت ملاتړ په افغانستان کې د بشري مرستو د فعالیتونو په دوام کې مهم رول لوبولی دی.
افغانستان په وروستیو کلونو کې د کډوالو د پراخې راستنېدنې، اقلیمي بدلونونو او طبیعي پېښو له امله د بشري مرستو له زیاتېدونکو اړتیاوو سره مخ شوی دی.
د ملګرو ملتونو د راپور له مخې، د ۲۰۲۳ او ۲۰۲۵ کلونو ترمنځ شاوخوا ۴.۹ میلیونه کسان هېواد راستانه شوي دي چې دې بهیر پر محدودو سرچینو او بنسټیزو خدمتونو فشار زیات کړی دی.
