۸صبح، کابل: د ملګرو ملتونو د بشردوستانه مرستو د همغږۍ دفتر (اوچا) ویلي چې افغان ځوانان دې د زدهکړو او خپلې راتلونکې د جوړولو فرصت ولري، خو ډېرو نجونو ته دا فرصت له لاسرسي وتلی دی.
نوموړي سازمان پنجشنبه د زمري پر ۲۲مه په اېکس کې لیکلي چې هر ځوان زدهکړو ته د لاسرسي او د خپلو استعدادونو او وړتیاوو د غوړېدو لپاره د فرصتونو د ترلاسه کولو وړ دی.
اوچا ټینګار کړی چې زدهکړه د ځوانانو د راتلونکي په جوړولو کې مهم رول لري او هېڅ ځوان دې له دغه فرصته نه بې برخې کېږي.
دا په داسې حال کې ده چې په افغانستان کې د نجونو پرمخ له شپږم ټولګي پورته ښوونځيو او پوهنتونونو کې پر زدهکړو لګېدلی بندیز دوام لري.
د ملګر ملتونو ښوونیز، علمي او کلتوري سازمان (یونسکو) ویلي چې افغانستان په نړۍ کې یوازینی هېواد دی چې له لومړنیو زدهکړو وروسته یې د نجونو او ښځو پر زدهکړو رسمي بندیز لګېدلی دی.
د دغه بنسټ د اټکل له مخې، تر ۲۰۲۶ کال پورې شاوخوا ۲.۴ میلیونه نجونې له منځنیو زدهکړو محرومې پاتې شوې دي.
