۸صبح، کابل: د ملګرو ملتونو د بشري مرستو د همغږۍ دفتر (اوچا) اعلان کړی، چې د روان میلادي کال په لومړیو درېیو میاشتو کې په ټول افغانستان کې پر میلیونونو اړمنو کسانو «نغدي او د کوپون مرستې» وېشل شوې دي.
دغه سازمان پنجشنبه د غبرګولي پر ۱۴مه، راپور ورکړی چې د اوچا بشري شریکانو له جنورۍ تر مارچ میاشتو کې په افغانستان کې ۲.۳ میلیونه کسانو ته ۲۰.۳ میلیونه ډالره «نغدي او د کوپون مرسته» رسولې ده.
د راپور له مخې، دا مرستې په کړکېچنو شرایطو کې د زیانمنو شویو کورنیو د سمدستي اړتیاوو د پوره کولو په موخه شوې دي.
اوچا ټینګار کړی چې نغدي مرستې کورنیو ته دا زمینه برابروي څو خپلې لومړنۍ اړتیاوې په عزت سره او د خپلو لومړیتوبونو پر بنسټ پوره کړي.
دا مرستې په داسې حال کې کېږي چې د افغانستان د نفوس لویه برخه د بېوزلۍ، لوږې، بېکارۍ او نړیوال ملاتړ د کمښت په څېر وروستیو ناورینونو له امله بشري مرستو ته جدي او بېړنۍ اړتیا لري.
تر دې وړاندې د روغتیا نړۍوال سازمان (WHO) هم اعلان کړی و، چې اټکل کېږي په ۲۰۲۶ کال کې په افغانستان کې نږدې ۳.۷ میلیونه تر پنځو کلونو کم عمره ماشومان پر خوارځواکۍ اخته شي.
