۸صبح، کابل: د ملګرو ملتونو د بشردوستانه مرستو د همغږۍ دفتر (اوچا) ویلي چې د ژمي په نږدې کېدو، د هغو کورنیو اړتیاوې چې افغانستان ته راستنېږي، پراخېږي.
دغه بنسټ سهشنبه د وږي پر ۲۴مه راپور ورکړی چې ډېرې کورنۍ له اړینو اسانتیاوو پرته افغانستان ته راځي.
اوچا ویلي چې د دغو کورنیو ځينې یې له مناسبې سرپناه پرته، بشرپالو مرستو ته محدود لاسرسی لري.
یاد سازمان زیاته کړې چې د ژمي په پيل سره ښايي د دغو کورنیو وضعیت سخت او بېړنیو مرستو ته یې اړتیا زیاته شي.
اوچا ټينګار کړی چې پر وخت د بشردوستانه مرستو برابرول د راستنو شویو کورنیو وضعیت ښه کولی شي او ښايي د ستونزو په کمولو کې یې اغېزمن وي.
