۸صبح، کابل: د ملګرو ملتونو د بشري چارو د همغږۍ دفتر (اوچا) ویلي چې په افغانستان کې میلیونونه کورنۍ هره ورځ د اقتصادي او معیشتي ناورین اغېزې احساسوي.
اوچا د دوشنبه د چنګاښ پر ۱۵مه، پر خپله اېکس پاڼه لیکلي چې ښايي په افغانستان کې دا ناورین نور د نړیوالو رسنیو سرلیکونه جوړ نه کړي، خو بیا هم پر میلیونونو کورنیو ژور اغېز لري.
دغه اداره وایي چې د بیا رغونې بهیر یوازې د بېړنيو اړتیاوو پوره کول نه دي، بلکې اوږدمهالی کار او هڅې غواړي.
اوچا دغه راز د ټولنو د پیاوړتیا، د معیشتونو د بیا رغولو او د خلکو د ملاتړ له لارې د یو هیله بښوونکي راتلونکي د جوړولو پر اړتیا ټینګار کړی دی.
دا په داسې حال کې ده چې د ملګرو ملتونو پراختیایي پروګرام (UNDP) په یوه تازه راپور کې ویلي، ۷۴ سلنه افغانان لا هم له معیشتي ناامنۍ کړېږي.
