۸صبح، کابل: په افغانستان کې د ملګرو ملتونو د بشردوستانه مرستو د همغږۍ دفتر (اوچا) رییسې ایمي مارتین پر پایدار تمویل، بشردوستانه لاسرسي او اړمنو ته د مرستو رسولو په بهیر کې د ښځو پر ماناداره ګډون ټینګار کړی دی.
اوچا یکشنبه د تلې پر ۱۲مه په اېکس پاڼه کې لیکلي چې مارتین تېره میاشت د اروپايي پارلمان د عکسونو په یوه نندارتون کې ګډون کړی دی.
مارتین په دغه نندارتون کې په افغانستان کې اړمنو ته د لاسرسي پر وړاندې د شته ننګونو په اړه خبرې کړې او ویلي یې دي چې له هغوی سره د مرستو د دوام لپاره پایدار تمویل ته اړتیا ده.
نوموړې په افغانستان کې د بشري مرستو د رسولو په بهیر کې د ښځو پر ماناداره ګډون هم ټینګار کړی دی.
